O nox, diebus pulchrior,
O, quae expellis tenebras,
Nascentem quae vidisti eum,
Qui lux est mundi gentium,
O nox, qua sol iustitiae
Iniusto solo oritur,
Quae nites luce clarius,
Mysteriosa aperiens,
Salutat temet mundus, qui
Peccando mori debuit,
Sed viva voce cantitat,
Peccare quod non potuit
Qui mori tamen voluit
Et moriturus nascitur,
Qui morte mortem opprimit
Et immolandum se immolat. |166|
Salutat lacrimosa te
Parturiens quae virgo est,
Quae Dei parit filium
Ancilla Dei humilis.
Salutat, plenam gratiae
Quam salutavit angelus,
Quae parit plenum gratiae
Ac veritatis Iesum, te.
Salutant temet angeli,
Sollemni hymno Iesulum
Annuntiantes: Salve, qui
Salvandos salvas homines!
Salutant te pastores, qui
Pastorem bonum adeunt.
Relinquunt gregem, regem ut,
Qui natus est, nunc videant.
Iacentem in praesaepi nec
Non involutum fasciis
Mirantur regem, olim qui
Figetur cruci nudulus:
Qui dives fuit, pauper est
Et quod nunc habet paululum,
Id quoque ei adiment,
Quos dites reddit, homines. |167|
Dolores multos lenit, qui
Doloribus se onerat;
Honore vacans Dominus
Honore nosmet afficit.
Et dolorosam viam nunc
Inire coepit Dominus;
Dolose dominatus nunc
Domabitur diabolus.
Inanit nunc se Dominus
Et formam servi accipit;
Oboediens parabit, quam
Credentibus dat, gloriam.
*
O nox, diebus pulchrior,
O, quae expellis tenebras,
Oboediens salutat te
Inanis servi anima.
Crambeslagos. |